Frå hobbyklipp til eigen barber-shop

Marius Salte og Sivert Skarstein starta med å klippe kompisar heime. I starten var dei bekjente og ei felles interesse i frisering gjorde at gutane etterkvart blei gode vener.

Vi starta med å kaste ball fram og tilbake på korleis vi kunne bli betre. Etterkvart blei vi ganske gode vener og på eit tidspunkt lufta eg tanken om å gå saman for å starte ein barber-shop. Eg måtte jobbe litt med Sivert for å få han med, fortel Marius med eit smil.

Etter å ha sett på fleire lokale landa dei til slutt på Havglytt. Salongen har fått nokre strøk maling, stilig belysning og eit bilete frå den lokale kunstnaren HKI prydar veggen. No har dei hatt opent i tre veker og merkar effekten av å vere i eit bygg med mykje aktivitet.

Samlokalisering gir auka kundemasse

Vi hadde allereie ein kundemasse på rundt 200 personar før vi flytta hit, alt frå fem år til dei over 50. Det har komt nokre potensielle kundar innom fordi dei er på huset, og ser at dei kan få seg ein klipp når dei først er her, fortel Sivert.

Marius satsar fullt på West Cutz, medan kollegaen Sivert kombinerar arbeidet i salongen med skule.

Ønsker du deg ein fresh fade, kan du ta turen innom West Cutz, som har opent mandag – lørdag frå klokka 9 om morgonen og utover kvelden. Booking av time gjer du på westcutz.no.