Eg var veldig uroleg på ungdomsskulen. Eg hadde mykje angst, og fekk ikkje med meg noko av det som skjedde i timane. I tillegg syns eg det var vanskeleg å finne ut kva eg ville jobbe med. Gymnaset ville eg i alle fall ikkje begynne på, for der var det for mange ukjende folk. Så eg begynte på rørleggarlinja, for på den tida låg den ute i Gunhildsvågen. Vekke frå alle dei ukjende folka. Det likte eg. Men så vart rørleggarlinja flytta dit den vidaregåande skulen ligg, og då begynte eg å slite. Det var altfor mykje folk, og det enda med at eg slutta på skulen, fortel Terje.

Etter dette gjekk det nedover for Terje. I 20 åra starta han å ruse seg, og hamna utanfor samfunnet. Til slutt kom han inn i narkotikadomstols-programmet og fekk hjelp til å slutte med rusen. Eit samspel mellom fleire aktørar var avgjerande for at Terje vart rusfri og kom seg ut i jobb.

Fekk jobb i Origod

Eg hadde eit ansvarsmøte med NAV, ruspsykiatrien, fastlege og psykolog. Eg hadde lyst til å søke jobb, men var redd. Då foreslo NAV at vi kunne sende ein søknad til Origod, og at det ville ta 3 – 4 månadar før vi fekk svar. Det tenkte eg var så langt fram i tid at det ikkje gjorde noko. Men så enda det med at eg fekk jobb hos Origod tre dagar etter at søknaden var sendt.

Arbeid gjer godt

No har eg jobba på Origod i over fem år og køyrer «matteruta» rundt til bedrifter. Her hentar eg dei skitne mattene som eg bytter ut med nye og reine. Eg er min egen sjef når eg køyrer rundt til bedriftene og ordnar for dei. Det er berre eg og bilen min. Arbeidet har vore bra for meg. Då eg starta i jobben var eg veldig redd folk og såg ned i bakken når eg besøkte bedriftene. No er eg ikkje redd lenger, og slår gjerne av ein prat med folka eg møter. Eg har innsett at folk ikkje er farlege, fortel Terje.