Havglytt – ein uslipt diamant

HAVGLYTT – ein uslipt diamant

Leni Anita Notø har mange jern i elden, og då vi møter ho på aktivitetssenteret Havglytt, forstår vi at det er rett dame på rett plass. Ho er både leiar for AFT Florø (Arbeidsførebuande trening) og dagleg leiar for Havglytt, og glødande opptatt av aktivitet. Her blir alle ønskt varmt velkommen, og vi prøver å legge til rette for at alle skal trivast. Nokre kjem her for å vere sosiale og møte andre, medan andre gjerne vil ut av huset heime, men ønskjer å komme til ein rolegare plass enn ein vanleg kafé i byen.

Kaféen er sjølve hjartet på Havglytt, og vi legg vekt på at det skal vere ein meir personleg møteplass. Maten er god og heimelaga «kvardagskost» som vi lagar her på kjøkkenet. Vi pyntar borda med duk og blomster, og vi ønskjer alle velkomne. Vi dekker på både eit stort langbord og fleire små bord.

Døropnar mot verda

I tillegg til at Havglytt skal vere ein god plass for folk å komme til, så er det ein god plass for dei som er inne i AFT-programmet vårt, forklarer Leni Anita. Folk kan jobbe på kjøkkenet her i opp til tre månader som arbeidstrening, før dei eventuelt går ut i ordinært arbeid. Drifta av kaféen er basert på at vi som er tilsette her skal klare jobben, presiserer Leni Anita. Arbeidstreninga skal kjennest trygg og forutsigbar, og vi ser på Origod som den vesle døropnaren for at folk kan komme seg vidare ut i verda.

Huset med det rare i

Dette huset er ein uslipt diamant, både fysisk og innhaldsmessig. Det er stort potensiale her, og aktiviteten er aukande. Vi spring i hælane på Leni Anita, som viser fram små og store rom med alle slags tenkelege aktivitetar, frå oppussing av møblar i kjellaren til yoga og kafé i hovudetasjen. I utgangspunktet var huset tenkt som ein møteplass for eldre, men vi har dagleg rundt 100 personar innom dørene, i aldersgruppa 5 til 95 år.