Origod er godkjent lærebedrift, og for tida er ­Bjørnar Storehaug Svoen (20) lærling på andre året i den mekaniske verkstaden. Målet er å få fagbrev som sveisar. Den unge naustedølen starta på ­teknologi- og industrifag i Førde, og etter å ha prøvd ut ulike fag fekk han tilbod frå NAV og Opplæringskontoret for tilrettelagt fagopplæring (OKTF) om å teste ut Origod i Florø.

Det vart ein god match og etter litt prøvetid fekk han lærekontrakt i sveisefaget. Eg trivast veldig godt og får god oppfølging av dei andre som jobbar her. Vi lagar ting til både bedrifter og private og arbeidet er veldig variert.

Likar kreativt arbeid

Bjørnar fortel at han likar best å sveise i rustfritt og aluminium. Dei fleste tinga vi produserer er etter teikning, men av og til kan vi vere litt meir kreative. I den siste tida har han laga tre grillar av innmaten til varmtvassberedarar, og her får han litt meir fritt spele­rom. Eg likar best når eg får bestemme litt sjølv, og får bruke kreativiteten min, smiler han.

Kjekk læreplass og kollegar

Eg er godt fornøgd med å ha fått læreplassen min her, og har kjekke folk å jobbe i lag med, fortel ­Bjørnar, som pendlar dagleg med buss til og frå Naustdal. Eg har litt tilpassa opplegg sidan eg har hatt skulevanskar, men no har eg trua på at eg skal klare å få fagbrevet i boks.