5 på Origod

Joakim Berg Sundsøy

Jobbkonsulent Florø

Eg starta her hausten 2009, og kan vise til snart 16 år hos Origod.
Eg kan oppsummere jobben min med at eg jobbar med folk. Joakim sine hovudoppgåver er knytt til tiltaka arbeidsførebuande trening (AFT), arbeidsretta rehabilitering (ARR) og han har oppfølging i prosjektet HELT MED. Det er ei stifting som bidrar til mangfald og inkluderande arbeidsliv, ved å opprette arbeidsplassar for menneske med utviklingshemming, utviklingsforstyrrelse og lærevanskar.
Å sjå at folk kan utvikle seg og klare å finne seg ein jobb, er noko av det beste med jobben. Det å gjere ein forskjell for andre er motiverande. Eg har ein veldig variert arbeidskvardag, og vi har eit kjempegodt arbeidsmiljø i bedrifta. Det er viktig for at alle skal trivast.

Frida Risan

Jobbrettleiar Førde / Florø

Eg starta her i august 2024, i teamet oppfølging.
Mi viktigaste oppgåve er å bistå jobbsøkarar i å finne jobb, og ikkje minst å sikre at folk blir i jobben. Gjennom kartlegging og relasjonsbygging skal eg og deltakar finne den beste jobbmatchen. Eg fungerer som jobbstøtte og rådgjevar for både arbeidssøkar og arbeidsgjevar, slik at vi kan tilpasse til dømes arbeidsoppgåver og arbeidstid. Målet er at arbeidsforholdet skal vare og bli permanent.
Eg er fersk i jobben, men er veldig glad i teamet som jobbar med oppfølging i Origod Fram. I jobben møter eg eit breitt spekter av ulike menneske og vi er opptatt av å sjå moglegheitene framfor avgrensingane. Her blir alle tatt godt i mot, både vi som jobbar her og deltakarane som skal få hjelp til vegen vidare.

Arnhild Mallasvik

Avdelingsleiar AFT Førde

Eg har jobba her sidan 2015.
Eg begynte hos Mentro for 10 år sidan, og jobbar administrativt med Arbeidsførebuande Trening (AFT) her i Førde. Ein viktig del av Arnhild sin jobb er kursing og trening av arbeidssøkarar, som til dømes; Kurs i meistring av belastning (KIB) og Kurs i meistring av depresjon (KID).
Det beste med jobben min er når arbeidssøkarane når måla sine. Å få vere med på den reisa der folk lukkast og får eit betre liv, er ei god oppleving.

Raimund Chscanovic

Arbeidsleiar trearbeid Førde

Eg har jobba her i 14 år.
Eg begynte hos Sunnfjord Drift i Florø i 2011, og starta på trearbeid i Førde etter fusjonen i 2019. Jobben min er å ha oversikt over ordrar og leveringar, at vi har materiale på plass og sørge for at arbeidet blir gjort på ein god måte.
Det som er bra med jobben her er gode lokale med moderne maskiner og ikkje minst kjekke kollegar. Raimund er veldig fornøgd med at han har fått fagbrev som CNC-operatør, med god hjelp frå arbeidsgjevar. Eg fekk alt godt tilrettelagt og dei beste vilkåra ein kan få.

Siv Rimmen

Økonomisjef

Eg starta i Nærtenesten i august 2012, så det nærmar seg 13 år.
Eg tar meg av økonomien til Origod frå A til Å, det vil seie at eg har ansvar for bokføring, fakturering, løn og årsoppgjer. Det gjer til at ein får større eigarskap til det ein gjer. Origod består av så mange ulike avdelingar slik at arbeidet blir veldig variert.
Det som eg likar aller best med jobben er at eg har så utruleg mange kjekke kollegar, i alle avdelingar. Vi er ein god miks av folk som går veldig godt saman. Sjølv om eg jobbar med økonomien så blir eg godt kjent og involvert i alle som jobbar her på huset. Døra mi er alltid open, og folk frå alle avdelingane stikk innom for ein liten prat. Det er høg trivselsfaktor her.